Vrasja e 15-vjeçarit në Gramsh, Shkolla “Asllan Shahini”: Jemi të tronditur, Fationi u ndodh aty rastësisht

Vrasja e 15-vjeçarit në Gramsh, Shkolla “Asllan Shahini”: Jemi të tronditur, Fationi u ndodh aty rastësisht

“Fationi u ndodh rastësisht aty, duke mos qenë ai pjesë e konfliktit në rrjetet sociale, por një i afërmi i tij. Ai u përpoq t’i ndante në grindje e sipër, por përfundoi viktima e këtij sherri banal”, shkruhet në adresën e shkollës në rrjetin social Facebook.

Shkolla 9-vjeçare “Asllan Shahini” ka reaguar ndaj ngjarjes që tronditi qytetin e Gramshit, ku nxënësi Fation Bici humbi jetën pas një sherri me thika mes disa bashkëmoshatarëve të tij. 15-vjeçari ndërhyri të shuante sherrin e ndezur për rrjetet sociale mes të afërmit të tij, dhe disa prej bashkëmoshatarëve, por përfundoi në viktimë, pasi plagët që mori, ishin vdekjeprurëse.

“Jemi thellësisht të tronditur, nga ngjarja e rendë që ndodhi sot në qytetin tonë, në të cilën humbi jetën Fationi,nxënës në klasën e IX. Fationi mbaroi mësimin, si çdo ditë tjetër, u interesua duke pyetur rojën e shkollës, se a ishte larguar nga shkolla motra e tij më e vogël, nxënëse në klasën e IV, e pasi u sigurua se ajo ishte larguar, u nis për në shtëpi. Në mes të lagjes, në mes të ditës, moshatarë të tij, nxënës edhe këta nga shkolla e fshatit Drizë, konfliktohen për biseda banale në rrjetet sociale, dhe konflikti kthehet në tragjedi… Fationi u ndodh rastësisht aty, duke mos qenë ai pjesë e konfliktit në rrjetet sociale, por një i afërmi i tij. Ai u përpoq t’i ndante në grindje e sipër, por përfundoi viktima e këtij sherri banal.

Fationi u nis sot drejt Parajsës…

Do na mungosh të gjithëve, Fation i dashur!

Të qoftë dheu i lehte, o engjëll!”, shkruhet në adresën e shkollës në rrjetin social Facebook.

Ngjarja e rëndë ndodhi rreth orës 13:30 minuta të ditës së martë (16 maj) pranë shkollës “Asllan Shahini.

Gjithçka u zhvillua në rrugë ku 5 adoleshentët sipas deklaratës se policisë u përfshinë në një konflikt të çastit, ku një prej tyre qëlloi me thikë 15-vjeçarin Fation Bici.

Për shkak të dëmtimeve të rënda, ndonëse i mituri u transportua në spital, nuk mundi të mbijetojë.